Eth termini entà presentar es sollicituds serà enquiath pròplèu dia 18 de junh de 2018

Vielha, 21 de mai de 2018.- Eth Conselh Generau d’Aran, mejançant era Oficina de Joenessa, darà supòrt ara convocatòria des ajudes entàs estudiants universitaris des comarques der àmbit d’Aran e der Alt Pirenèu (APA).

Es bèques se dirigissen a estudiants des universitats publiques catalanes.

Aguestes ajudes se concediràn entara mobilitat, aguesta mobilitat se compren coma desplaçament e lotjament dehòra dera comarca a on s’a era residéncia familhara. Ne pòden èster beneficiaris es estudiants que complisquen es requisits que seguissen:

Requisits generaus:

  1. Auer era nacionalitat espanhòla o de bèth estat membre dera Union Europèa. En cas des estudiants estrangèrs non-comunitaris an d’acreditar era sua condicion de residents.
  2. Residir en ua des sèt comarques: Aran, Alt Urgell, Alta Ribagorça, Cerdanya, Pallars Jussà, Pallars Sobirà e Solsonès, coma minim des der 1 de gèr de 2015.

Requisits academics:

  1. Èster inscrit o inscrita en ua universitat deth sistema universitari catalan eth cors 2017-2018 en uns estudis encaminats ara obtencion d’un títol oficiau de grad, licenciatura, engenharia, arquitectura, diplomatura o ensenhaments universitaris tecnics.
  2. Èster inscrit o inscrita en uns estudis que s’impartisquen de manèra presenciau.
  3. Enes estudis de grad, èster inscrit o inscrita en cors actuau de 60 credits, en cas d’inscripcion entath cors complèt, o de 30 credits, enes casi d’inscripcion semestrau, entà cada semestre. En cas d’inscríuer-se d’un nombre inferior de credits, cau aportar ua acreditacion deth centre que justifique que s’a inscrit deth nombre maximal de credits cossent damb era organizacion administrativa deth centre. Non se pòt acuélher ad aquera opcion es escolans que, a causa deth sòn rendiment academics enes corsi anteriors, non s’agen pogut inscríuer en nombre de credits previsti.
  1. Auer superat eth 80% des credits inscriti en cors anterior o en darrèr cors efectuat en ensenhaments des branques de coneishença d’arts e umanitats, sciéncies, sciéncies dera salud e sciéncies sociaus e juridiques e eth 60%, en cas des ensenhaments tecnics des branques de coneishença d’engenharia e arquitectura, sonque en cas des persones sollicitantes que non inícien per prumèr còp estudis universitaris eth cors 2017-2018.
  1. Demoren excludits d’aguesta convocatòria es persones qu’agen bèra titulacion universitària superiora e es persones qu’agen era independéncia familhara e economica dera sua unitat familhara.

Requisits economics:

Cau non depassar es limits de renda familhara disponibla e de patrimòni establidi.

Er impòrt maximun entà cada ajuda serà de 2.000 èuros.

Sollicituds e documentacion:

Era sollicitud s’a de completar mejançant eth formulari accessible via internet a trauèrs dera sedença electronica dera Generalitat de Catalonha.

 

Era documentacion a adjuntar:

  • Fotocòpia deth document nacionau d’identitat deth/dera sollicitant e de toti es membres computables dera unitat familiar majors de 14 ans.
  • Numèro deth compde bancari dera persona sollicitant.
  • Certificat municipau de convivéncia a on cònste era data d’inscripcion en padron dera persona sollicitaira en un municipi des comarques mencionades, aumens des der 1 de gèr de 2015. Eneth cas qu’es persones s’agen empadronat posterioraments ath 1 de gèr de 2015, ath delà deth certificat de convivéncia a on cònste era data d’alta deth padron municipau de tota era unitat familhau, cau presentar era documentacion acreditatiua deth centre d’ensenhament a on era persona sollicitant a estudiat eth cors 2015-2016 e/o quinsevolha auta documentacion que sigue acreditatiua d’aguesta circonstància.
  • Fotocòpia der imprès dera matricula universitària corresponenta ath cors 2017-2018 damb era acreditacion que s’a hèt efectiu eth pagament. Se s’a optat per matricula semestrau, cau presentar era des dus semèstres.
  • Fotocòpia der imprès dera matricula universitària corresponenta ath cors 2016-2017. Se s’a optat per matricula semestrau, cau presentar era des dus semestres (sonque en cas des persones sollicitantes que non inícien per prumèr còp estudis universitaris eth cors 2017-2018).
  • Certificacion academica complèta, a on cònsten es assignatures e era convocatòria en qué s’an obtengut, eneth cas des persones sollicitants que non corsen peth prumèr còp estudis universitaris. En aguesta certificacion tanben a de constar, de manèra clara, eth totau de crèdits matriculadi e eth totau de credits aprovadi eneth cors academic 2016-2017.
  • Eneth cas des persones sollicitants que corsen peth prumèr còp estudis universitaris nòta PAU.
  • Enes casi qu’eth estudiant non s’age matriculat dera quantitat de credits exigidi pera convocatòria, li cau justificar que s’a matriculat deth nombre maximum de credits d’acòrd damb era organizacion administrativa deth centre o peth motiu de finalizar es estudis.

Entà que cap de joen dera Val d’Aran se quede sense poder participar en aguesta convocatòria, era Oficina de Joenessa deth Conselh Generau d’Aran facilitarà era tramitacion dera documentacion d’aguesta linha d’ajut.

Entà sollicitar aguest ajut se pòden adreçar tara Oficina de Joenessa damb cita per auança, plaçada en Carrer Major 36, en orari d’atencion ath public: de deluns a diuendres de 08:00 a 15:00 ores. Telefon: 973640625

Eth termini entà presentar es sollicituds serà enquiath pròplèu dia 18 de junh de 2018.