Aguesta guida qu’auràs enes tues mans en pòc temps, t’ajudarà a trapar qui pòt dar-te era informacion qu’as de besonh e tanben a on pòs trapar-la o a on trucar. Atau donques, damb ua guida soleta poderàs saber toti es servicis e programes ja qu’ei ua guida integrau.

Servís tà informar-te de tot es servicis que pòs utilizar e tà auer-la per s’en quinsevolh moment l’as de besonh per bèra causa importanta qu’ages de hèr.

Sonque cau que cerques eth tòn servici (ço qu’as de besonh) laguens d’ua des tematiques qu’organizen era guida.

Tà hèr-la mos auem metut en contacte damb toti es departaments e oficines deth Conselh Generau d’Aran tà entrevistar-mos e que mos expliquèssen quini des sòns servicis pòden èster utilizadi pera gent joena. Eri mos an explicat qué hèn en aguesti moments e nosati ac auem ordenat en punts e per tematiques.

Es tèmes son diuèrsi, entà integrar tota era globalitat des servicis. Pòs trobar tematiques coma: trabalh, abitatge, educacion, cultura, consum, participacion, espòrts, entitats,…

Se vòs informacion sus un servici que non gesque ena guida, non te preocupes pr’amor que pòs vier a cercar quinsevolh tèma que t’interèsse. Nosati te daram era respòsta e cercaram damb qui as de parlar e t’informaram.