Vielha, 12 d’abriu de 2018.- Deman diuendres 13 d’abriu se daurís eth periòde de preinscripcion e matrícula d’alumnes enes centres deth Servici d’Educacion dera Val d’Aran.
Era preinscripcion e matrícula ei entara admission d’alumnes de dusau cicle d’educacion infantila, d’educacion primària, d’educacion segondària obligatòria, de bachillerat, de formacion professionau de grad miei e de grad superior.
En cas des escòles dera Val d’Aran, deman 13 d’abriu se daurís eth periòde de matriculacion ena escòla de Vielha e Mijaran, e de preinscripcion enes de Bossòst e Les.
Eth procès de preinscripcion e matricula s’inície damb era publicacion dera aufèrta iniciau e finalize damb era matriculacion der alumne. Cau presentar era sollicitud de preinscripcion enes casi següents:
- Entà èster admetut per prumèr còp en un centre entà corsar quin ensenhament sufragat que sigue damb hons publics.
- Entà accedir ath dusau cicle d’educacion infantila.
En çò que tanh as ensenhaments de dusau cicle d’educacion infantila, educacion primària e educacion segondària obligatòria (ESO), eth periòde de presentacion de sollicituds ei deth 13 ath 24 d’abriu de 2018, ambdús includidi. Se pòt presentar documentacion enquiath dia 25 d’abriu de 2018.
En cas de Bachillerat e Cicles formatius de formacion professionau de grad miei e de grad superior, eth periòde de presentacion de sollicituds va deth 14 ath 24 de mai de 2018, ambdús includidi. Se pòt presentar era documentacion enquiath dia 28 de mai de 2018.
En çò que tanh a Programes de formacion e insercion, eth periòde de presentacion de sollicituds va deth 14 ath 25 de mai de 2018, ambdús includidi.
Entà obtier ua informacion mès detalhada o entà esclarir quinsevolh dobte que sigue pòden dirigir-se entara Oficina Joenessa dera Val d’Aran, C/ Major 36, Vielha o contactar mejançant corrèu electronic a joenessa@aran.org telf. 973 64 06 25. Er orari d’atencion ei de maitins, de deluns a diuendres de 8 a 15 ores e tardes, deluns e dimars de 15.30 a 18 ores.
Trobarà era informacion complèta en: http://queestudiar.gencat.cat/ca/preinscripcio/
Hilat entara preinscripcion deth Departament d’Ensenyament dera Generalitat de Catalonha.
